تحریک تحفظ آئین پاکستان نے حکومت سے بات چیت پر آمادگی ظاہر کردی

اسلام آباد: تحریک تحفظ آئین پاکستان نے حکومت سے بات چیت پر آمادگی ظاہرکردی ہے، شفاف انتخابات اور نئے الیکشن کمشنر کی تقرری پر بات چیت ہوگی۔

وزیراعظم کی مذاکرات کی پیشکش پر اپوزیشن الائنس کا اہم اجلاس منعقد ہوا جس میں یہ فیصلہ سامنے آیا، تحریک تحفظ آئین پاکستان نے شفاف انتخابات اور نئے الیکشن کمشنرکی تقرری پرڈائیلاگ پر آمادگی ظاہر کی ہے، اجلاس میں آئینی و جمہوری اقدار کے استحکام کیلئے بات چیت پر اتفاق ہوا۔

سیاسی و معاشی بحران سے نکلنے کیلئے نئے میثاق کی ضرورت پر بھی اتفاق کیا گیا، بانی پی ٹی آئی سے نئے میثاق پر دستخط کرانے کی ذمہ داری لینے کا بھی اعلان کیا گیا۔

دریں اثنا محمود خان اچکزئی کی زیرِ صدارت تحریک تحفظِ آئین پاکستان کا اہم اجلاس ہوا، اجلاس میں اپوزیشن کی 2 روزہ قومی کانفرنس کو کامیاب قراردیا گیا، پاکستان سمیت دنیا بھر میں 8 فروری کو یومِ سیاہ منانے کا فیصلہ کیا گیا ہے۔

ترجمان تحریک تحفظ آئین پاکستان نے بتایا کہ یومِ سیاہ کے موقع پر ہڑتال اور اسٹریٹ موبلائزیشن پر مشاورت ہوئی، وزیراعظم کی مذاکرات کی دعوت پر بھی غور کیا گیا۔

پارلیمانی بالادستی، قانون کی حکمرانی اور انسانی حقوق نئے میثاق کا حصہ ہوں گے، محمود اچکزئی نے 1973 کے آئین کی بحالی پر زور دیا۔

ترجمان تحریک تحفظ آئین پاکستان نے مزید بتایا کہ 8 فروری کے یومِ سیاہ کو کامیاب بنانے کیلئے ذیلی کمیٹیاں بنانےکا فیصلہ ہوا، صوبائی اور ڈسٹرکٹ سطح پر کمیٹیوں کے قیام کا اعلان بھی جلد متوقع ہے۔

from ARYNews.tv | Urdu – Har Lamha Bakhabar https://ift.tt/dJWEXUC
via IFTTT