سری لنکا کرکٹ ٹیم ٹرائنگولر سیریز کیلئے پاکستان پہنچ گئی

اسلام آباد(9 نومبر 2025): سری لنکا کرکٹ ٹیم کپتان چریتھ اسالنکا کی قیادت میں اسلام آباد پہنچ گئی۔

پاکستان اور سری لنکا کے درمیان تین ون ڈے انٹرنیشنل میچوں کی سیریز 11 سے 15 نومبر تک راولپنڈی کرکٹ سٹیڈیم میں کھیلی جائے گی جس کیلئے سریلنکن ٹیم پاکستان پہنچ گئی ہے۔

تین ون ڈے انٹرنیشنل میچز کے بعد ٹی ٹوئنٹی ٹرائنگولر سیریز کا آغاز ہوگا۔ پاکستان، زمبابوے اور سری لنکا ٹی ٹوئنٹی ٹرائنگولر سیریز میں مدمقابل ہوں گے، ٹی ٹوئنٹی ٹرائنگولر سیریز راولپنڈی اور لاہور میں 17 سے 29 نومبر تک کھیلی جائے گی۔

پاکستان، سری لنکا اور زمبابوے کے درمیان 11 سے 27 نومبر تک لاہور اور راولپنڈی میں ہونے والی آئندہ سہ ملکی کرکٹ سیریز کے لیے حفاظتی اقدامات کو حتمی شکل دے دی گئی ہے۔

محکمہ داخلہ پنجاب کے مطابق پاک فوج اور رینجرز کی ایک کمپنی لاہور میں تعینات کی جائے گی جبکہ فول پروف سیکیورٹی کو یقینی بنانے کے لیے تین تین کمپنیاں راولپنڈی میں تعینات کی جائیں گی۔

اس کے علاوہ آرمی ایوی ایشن کے ہیلی کاپٹر فضائی نگرانی میں معاونت کریں گے جب کہ فوجی دستے آئین کے آرٹیکل 245 اور پاکستان رینجرز آرڈیننس 1959 کے تحت تعینات کیے جائیں گے۔

8 سے 30 نومبر تک سیکیورٹی کے انتظامات برقرار رہیں گے تاکہ پوری سیریز میں کھلاڑیوں اور شائقین کے لیے محفوظ اور پرامن ماحول کو یقینی بنایا جاسکے۔

from ARYNews.tv | Urdu – Har Lamha Bakhabar https://ift.tt/s5316RJ
via IFTTT